စရာဲက္ညၚ်

ခၟဳသၚ်မန်ကီု သီုအာစာဘာမန်
အ္စာၝောံမန်ကီု သီုညးဇၞော်မန်
တၠပညာမန် ဇၟာပ်မန်ဟွံခၠန်
သွာၚ်လိက်ပတ် ပ္တိတ်ဓတ်ပံက်ဘာမန်။

ဘာမန်က္ညၚ်ကၠာ သာယာဂွံဆဵု
ကွးဘာမန်ဇဳ ညဳသာနွံမ္ၚဵု
ကောံကၠုၚ်ဂြုဂြု ဗြုက္ညာၚ်မိၚ်အဵု
ရမျှာၚ်မန် လိက်မန်နွံကဵုမ္ၚဵု။

ကွးဘာစိုတ်တ္ၚအ် ဗန်ကအ်ညဳသာ
ဇက်ဂၠောဲတိုန်ကၠာ အာဗ္တောန်ပညာ
က္ညၚ်ၜိုန်ကတူ ဗီုကဴဝဴကၠာ
ကရေဲက္ညာၚ်လိက်မန် မိပ်လောန်ညဳသာ
ဇၟာပ်မိၚ်ဆာဲ နွံစရာဲက္ညာၚ်ပညာ။

စရာဲက္ညၚ်ပၠန် မန်လေပ်လိက်မန်
မန်တီလိက်ပတ် မန်ဗ္တောန်လိက်မန်
မန်ကၠောန်သွက်မန် မန်ကတ်လိက်မန်
နွံဂုဏ်လောန် စဳစောန်အလုံဍုၚ်မန်။

စရာဲက္ညၚ်ဂှ် ဒှ်လိက်ပတ်မန်
စရာက္ညၚ်ဂေါဝ် ညးကျောဝ်ဟွံခၠန်
စရာဲက္ညၚ်အး ညးထိုၚ်သးမန်
စရာဲက္ညၚ် ခၟဳသၚ်ပံက်ဘာမန်။

စရာဲပြဲက္ညၚ် ထံက်ပၚ်ပညာ
စရာဲပြဲက္ညၚ် ခၟဳသၚ်ညဳသာ
စရာဲပြဲက္ညၚ် အ္စာဘာညဳသာ
စရာဲက္ညၚ် မန်ဟွံကၠၚ်ပညာ။

( ရာမည လွဳဟံၚ်နန်)