ဘာသၠုၚ်ပ္တိုန်စရာဲ ဆဝ်မ္ၚုဟ်စန္ဒက်ကုသၟတ် ပွိုၚ် (၈) ဂိတု

ဂကောံသၟတ်မန်လညာတ်တၟိဝွံ ရန်တၟံကဵု သၟတ်မန်တအ် ဂွံတီကၠိုဟ်ကေတ် နဲကဲဆဝ်မ္ၚုဟ်ညးဍုၚ်ကွာန် တုဲ ဂွံသုၚ်စောဲနတဲ ပ္ဍဲကာလဆဝ်မ္ၚုဟ်ညးဍုၚ်ကွာန် ပ္ဍဲအကာဲအရာ ပရူပရာမွဲမွဲသာ်ရန်တုဲ ပံက်ကၠုၚ်ဘာ (၈) ဂိတုဏံရ။ ပ္ဍဲဘာဏံဝွံ ကွးဘာနူဒေသစုၚ်တအ် ဗၞတ် (၂၁) တၠ တိုန်ကတ်လ္ၚတ်ကၠုၚ်လဝ်ရ။ ဘာဏံဝွံ ပံက်ကၠုၚ် လ္တူဍုၚ်မတ်မလီုရ။ ပ္ဍဲဘာဏံဝွံ သ္ပအဓိကကဵု ဘာသာပရေၚ်ဆဝ်မ္ၚုဟ်စန္ဒက်တုဲ ဗ္တောန်ကၠုၚ်ကဵု လညာတ်၊ တဳအဝ်ရဳ ဗွဲကိုပ်ကၠာတုဲ ကဵုညးတိုန်စိုပ်တအ် ဓမံက်ရုပ်ရဴနတဲ မပ္တံကဵု ကလေၚ်ကဵုတန်ဗ္တောန်၊ တက်ကဝးရုပ်ဒမျာၚ် လဝေၚ်ဇာတ် ဂဥုဲၜူမာဲ သွက်ဂွံကဵုပညာ ဆဝ်မ္ၚုဟ်ညးဍုၚ်ကွာန်တအ်နွံရ။ သ္အာၚ်နူကဵု က္ဍိုပ်လိက်ပရေၚ်ဆဝ်မ္ၚုဟ်စန္ဒက်တုဲ က္ဍိုပ်လိက် စပ်ကဵု ပရေၚ်အာက္ဍိုပ်၊ ဒဳမဝ်ကရေဇြဳ၊ ပရေၚ်ဆက်ဆောံ ဟီုဂးလဒေါဝ်ဝိုၚ်၊ ပရေၚ်ကောပ်ကာဲအခိၚ်၊ ကမၠောန်၊ ကေုာံ ဂကောံကီု ၊ ဗဟုသုတမ္ၚး စပ်ကဵု ပရေၚ်ဍုၚ်ကွာန်တအ်လေဝ် ပါလုပ်ပါ်ပရအ်လဝ်ကီုရ။