လိက်ဒုၚ်စဳရေၚ် အန္တရာယ်သၟတ်

ဂကောံသၟတ်မန်လညာတ်တၟိဝွံ ရန်တၟံကဵု ဂွံတီကေတ် အကာဲအရာ သၟတ်မန်၊ ညးဍုၚ်ကွာန်မန် တအ် သုၚ်စောဲမံၚ်ဂဥုဲၜူမာဲ၊ ဂဥုဲဂကူလဵုဂှ် ရပ်စပ်သုၚ်စောဲဂၠိုၚ်မံၚ်၊ ဟိုတ်သာ်လဵုဂွံသုၚ်စောဲမံၚ်၊ နနဲလဵု ဒးဒုၚ်ရပ်စပ် ကေတ်မံၚ်အရေဝ် ကေုာံ နနဲလဵု ဂွံသောၚ်ပြဒ္ဒညာဂဥုဲၜူမာဲဏံမာန်တုဲ ပ္တိတ်ကၠုၚ်လဝ် လိက်ဒုၚ်စဳရေၚ် အန္တရာယ်သၟတ်ဏံရ။ လိက်ဒုၚ်စဳရေၚ်ဏံဂွံတိတ်ကၠုၚ်မာန်ဂှ် ကၠောန်ဗဒှ်လဝ် နနဲဝိုၚ်သဳကၠဳ ပကောံတၚ်နၚ် စပ်ကဵုဂဥုဲၜူမာဲ နူညးဍုၚ်ကွာန် ကေုာံ သၟတ် နူပွိုၚ်ဍုၚ်ဂမၠိုၚ် မပ္တံ ရေဝ်၊ မုဟ်ဍုၚ်၊ ဇြပ်ဗု၊ မတ်မလီု၊ ခၟိုၚ်၊ ကျာ်မြာ်၊ ကအ်ကြိက်၊ လှာဒကှ်၊ ကၞောဝ်ၜဳရေဝ် တအ် နကဵုလၟိဟ်မၞိဟ် ၅ ကၠံတၠ ပြၚ်ပြၚ်နွံရ။ သ္အာၚ်နူဂှ်ပၠန် ကၠောန်သ္ပကၠုၚ် ပရေၚ်သၟာန်သၟုက် ကုညးတာလျိုၚ် ဗော်ဍုၚ်မန်တၟိ၊ မိမညးဍုၚ်ကွာန်၊ ညးဒးမံၚ်ဘဲဒဏ် ဂဥုဲၜူမာဲတအ်လေဝ်နွံရ။ ဒုၚ်သ္ဇိုၚ်ကဵုလိက်ဒုၚ်စဳရေၚ်ဏံမ္ဂး ပ္ဍဲဒေသမန်ပိုယ်ဝွံ ညးသုၚ်စောဲမံၚ်ဂဥုဲၜူမာဲ နွံအကြာ ၇၀-၈၀% ရောၚ် ဂွံဆဵုကေတ်ရ။ ဂဥုဲၜူမာဲသုၚ်စောဲဂၠိုၚ်ဂှ် ဂဥုဲချေံ ဂွံဆဵုကေတ်ရ။ စပ်ကဵုတၚ်နၚ် သောဲသောဲဗြောဲဗြောဲတအ်တုဲ ဩဝ်ပံက်ဗှ်ကေတ် ပ္ဍဲလိက်ဒုၚ်စဳရေၚ်သၟဝ်တေံညိအဴ။