ဂကောံသၟတ်မန်လညာတ်တၟိဝွံ ဒှ်ဂကောံသၟတ်မန်သၟတ်ဗၠးၜးမွဲတုဲ ဒက်ပ္တန်လဝ်နကဵုဇြဟတ်သၟတ်နူဒေသနာနာ ဍုၚ်မန်၊ ဍုၚ်ကရေၚ်၊ ရးတနၚ်သဳရ။ စနူသၞာံ ၁၉၉၉ ဂိတုဂျောန် ၁၈ ဂှ် စချပ်ကၠုၚ် သွက်ဂွံဒက်ပ္တန်ဂကောံသၟတ်မန်မွဲ သ္ဂောံချဳဓရာၚ် ပရေၚ်သၟတ်၊ ပရေၚ်ဂကူ၊ ဂွံလွဳၜံၚ်ဒတောဲတွာ်အာ က္ဍိုပ်သ္ကိုပ်သၟတ်ရ။

ပ္ဍဲသၞာံ ၂၀၀၁ ဂိတုနဝ်ဝေန်ဗါ ၁၈ သၟတ်ညးချဳဓရာၚ်ပရေၚ်ဂကူ၊ သၟတ်နူဗော်ဍုၚ်မန်တၟိ၊ ညးတာလျိုၚ်ဗော်ဍုၚ်မန်တၟိ နူခရိုၚ်နာနာ ဂ္ဇံကၠုၚ်ကောံဓရီုတုဲ စဒက်ပ္တန်ကၠုၚ် ဂကောံသၟတ်မွဲ နကဵုယၟု ဂကောံသၟတ်လညာတ်တၟိ နကဵုသၞောတ်စှ်ေစှ်ေ ပ္ဍဲကွာန်ဝၚ်က၊ ဍုၚ်သေံရ။ ဂကောံသၟတ်မန်လညာတ်တၟိဝွံ ပ္တဝ်က္ဍိုပ်ကဵု ဓဝ်ၜိုဟ်လလံ၊ အခေါၚ်တုပ်သၟဟ်၊ အခေါၚ်သၠးပွးတအ်တုဲ ချဳဓရာၚ်ပရေၚ်သၟတ်၊ ပရေၚ်ဂကူ မပ္တံ သၠုၚ်ပတိုန်စရာဲသၟတ်၊ စရာဲညးဗြဴ၊ ဒက်ပခိုၚ်ဇြဟတ်ဂကောံသၟတ်၊ ဒက်ပ္တန် ပရေၚ်ကၠောံဍ၊ ပရေၚ်ပံၚ်တောဲ၊ ဓဝ်ညဳသာ အကြာသၟတ်မန် ကေုာံ ကောန်ဍုၚ်အရၚ်၊ သၠုၚ်ပတိုန်သၞောတ်ဒဳမဝ်ကရေဇြဳ၊ ဖေတ်ဒရာ၊ အခေါၚ်အရာနာနာ၊ ထိၚ်ဒဝ်လိက်ပတ်ယေန်သၞာၚ်၊ မၚ်မွဲပွဳပွူသဘာဝတအ်ရ။

ဇၟာပ်ပ် ၂ သၞာံ ကၠောန်ကၠုၚ်ကောံဓရီုဇၞော် သ္ၚဳဂၠိပ်ပဠေဝ်ပဠေတ် သ္ဇိုၚ်သၞောဝ်ဒက်ပ္တန်ဂကောံ၊ မူဝါဒနာနာ၊ လၟေၚ်ကမၠောန်နာနာ ကေုာံ ကၠောန်သ္ပပေါဲရုဲမာဲ ရုဲစှ်ကမ္မတဳအာက္ဍိုပ်၊ ညးတာလျိုၚ် ကဆံၚ်ၚ် ဥက္ကဌ၊ ဒု-သက္ကဌ၊ ညးအုပ်ကာ၊ ဖက်ဆော-ညးအုပ်ကာ နကဵုသၞောတ်ဒဳမဝ်ကရေဇြဳစှ်ေစှ်ေ၊ နကဵုဆန္ဒမာဲပၞုက်ရ။ စနူကောံဓရီုဇၞော် အလန်အဌမ သၞာံ ၂၀၂၂ တုဲ ဖျေံကၠုၚ်သ္ဂုတ်သွာတ် ကၠောန်သ္ပအာ ကောံဓရီုဇၞော်၊ ပေါဲရုဲမာဲ ၃ သၞာံမွဲဝါရ။

 

တိုၚ်ပ္ကဴ တၚ်ရန်တၟအ်

 

၁။ သ္ဂောံလွဳၜံၚ်အာ က္ဍိုပ်သ္ကိုပ်ခိုဟ် သွာၚ်ဇဳ။

၂။ သ္ဂောံဒက်ပခိုၚ်ဇြဟတ် ဂကောံသၟတ်ဂမၠိုၚ်။

၃။ သ္ဂောံဒက်ပ္တန် ဓဝ်ညဳသာ အကြာသၟတ်မန် ကေုာံ ကောန်ဍုၚ်အရၚ်ဂမၠိုၚ်။

၄။ သ္ဂောံ မၚ်မွဲ ဇၞော်ပၟဝ်ပ္တိုန်အာ အရေဝ်လိက်ပတ်အခိုက်ကၞာ ယေန်သၞာၚ် တၞောဝ်ဒတောဝ်မန်။

၅။ သ္ဂောံမၚ်မွဲ ထိၚ်ဒဝ်အာ ပွဳပွူသဘာဝ ပ္ဍဲဒေသမန် ကေုာံ အလုံကၟိန်ဍုၚ်။

 

လညာတ်ဂမြၚ်ဂကောံ

သ္ဂောံကလိဂွံ ဓဝ်ၜိုဟ်လလံ၊ အခေါၚ်တုပ်သၟဟ် ကေုာံ အခေါၚ်သၠးပွး ပ္ဍဲဂကောံမၞိဟ်ပိုဲရောၚ်။

ဂၠံၚ်တရဴ

သ္ပသ္ဇိုၚ်ကဵုဇြဟတ်သၟတ်တုဲ ပံၚ်တောဲကၠောန်အာ ကု ဂကောံမှာဇန်နာနာ၊ ဂကောံချဳဓရာၚ် ပရေၚ်ဂကူမန်နာနာ ကေုာံ ဇြဟတ်ကောန်ဍုၚ်အရၚ်ဘဝတုပ်တအ်ရောၚ်။

တိုၚ်ပ္ကဴ

ဒးဒှ်အထံက်အရီု ပရေၚ်ရုန်ဂစာန်ဒက်ပ္တန်ကၟိန်ဍုၚ် ဖေတ်ဒရေဝ်ဒဳမဝ်ကရေဇြဳ၊ ကေုာံ အခေါၚ်အရာ ကောန်ဍုၚ်အရၚ်။

ပရေၚ်အံၚ်ဇၞး

စနူသၞာံ ၂၀၀၁ ဂကောံသၟတ်မန်လညာတ်တၟိ ဖောအ်ဗြေဝ်သၠုၚ်ပတိုန်အသိၚ် ဂကောံ၊ ပရေၚ်ကမၠောန်ဂကောံ ဒုၚ်

သ္ဇိုၚ်ကဵု တိုၚ်ပ္ကဴ တၚ်ရန်တၟအ်ဂကောံ ကေုာံ တၚ်နွံပၟိက်သၟတ်၊ ညးဒေသတအ်ရ။ ဂကောံသၟတ်မန်လညာတ်တၟိ ချဳဓရာၚ်ကၠုၚ် ပရေၚ်သၟတ်၊ ပရေၚ်ဂကူ မပ္တံ သၠုၚ်ပတိုန်စရာဲသၟတ်၊ စရာဲညးဗြဴ၊ ဒက်ပခိုၚ်ဇြဟတ်ဂကောံသၟတ်၊ ပရေၚ်ကၠောံဍ၊ ပရေၚ်ပံၚ်တောဲ၊ ပရေၚ်ညဳသာ အကြာသၟတ်မန် ကေုာံ ကောန်ဍုၚ်အရၚ်၊ သၠုၚ်ပတိုန်သၞောတ်ဒဳမဝ်ကရေဇြဳ၊ ဖေတ်ဒရာ၊ အခေါၚ်အရာနာနာ၊ ထိၚ်ဒဝ်လိက်ပတ်ယေန်သၞာၚ်၊ မၚ်မွဲပွဳပွူသဘာဝတအ်ရ။

ဂကောံသၟတ်မန်လညာတ်တၟိ ဒက်ပ္တန်ကၠုၚ် ဓဝ်ပတှ်ေ၊ ပရေၚ်ပံၚ်တောဲ ကုက္ဍိုပ်သ္ကိုပ်သၟတ်ဒေသ၊ က္ဍိုပ်သ္ကိုပ်ဘာသာ၊ ညးတာလျိုၚ်နာနာ၊ ဂကောံသၟတ်နာနာ၊ ဂကောံမှာဇန်နာနာ၊ ဂကောံအလဵုအသဳဟွံသေၚ်နာနာ၊ ကေုာံ ဂကောံသၟတ်ကောန်ဍုၚ်အရၚ်နာနာရ။

ဗွဲမအံၚ်ဇၞး ဂကောံသၟတ်မန်လညာတ်တၟိ သၠုၚ်ပတိုန်ဗဟုသတ၊ ဍာ်ဒကေဝ်၊ ပရေၚ်ဆဵုဂဗသၟတ် ကဵုလ္ၚီ ဇၟာပ်ပ်သၞာံရ။ ဂကောံသၟတ်မန်လညာတ်တၟိဝွံ လွဳၜံၚ်ဒတောဲတွာ်ကၠုၚ် က္ဍိုပ်သ္ကိုပ်၊ က္ဍိုပ်သ္ကိုပ်သၟတ် ညးချဳဓရာၚ်ပရေၚ်ဂကူ၊ ပရေၚ်ဍုၚ်ကွာန်၊ ပရေၚ်ဖောအ်ဗြေဝ် ပ္ဍဲဗော်ရပ်လွဟ်၊ ဗော်ပရေၚ်ဍုၚ်ကွာန်၊ ဂကောံမှာဇန်၊ ဂကောံအလဵုအသဳဟွံသေၚ်တအ်ရ။

ဂကောံသၟတ်လညာတ်တၟိ ဒက်ပ္တန်သၠုၚ်ပတိုန်ကၠုၚ်အခိၚ် ဂကောံသၟတ်ကွာန်၊ ဂကောံသၟတ်ပွိုၚ်ဍုၚ်၊ ပံၚ်တောဲဒက်ပ္တန်ကၠုၚ် ဌာန်ကောံသၟတ်မန် သၟးဟွံက ဒက်ပ္တန်ကၠုၚ်ဂကောံမဟာမိတ် ကု သၟတ်ကောန်ဍုၚ်အရၚ်၊ ဂကောံတိုၚ်ပ္ကဴတၚ်ရန်တၟအ်နာနာရ။

ဂကောံသၟတ်မန်လညာတ်တၟိ မၚ်မွဲထိၚ်ဒဝ် သၠုၚ်ပတိုန် အရေဝ်လိက်ပတ်၊ အခိုက်ကၞာယေန်သၞာၚ်မန် လၟေၚ်ၚ်ရ။ သ္အာၚ်နူဂှ်ပၠန် မၚ်မွဲထိၚ်ဒဝ်ကၠုၚ်ပွဳပွူသဘာဝ၊ ဒစဵုဒစးကၠုၚ်ကၠုၚ် ကိုန်အစဳဇန်သိုၚ်ကၟိုန်ဍာ် ပ္ဍဲၜဳသြၚ်လောန်၊ ကိုန်အစဳဇန် ဓလိုက်တမ်ရိုဟ် ဟွံမွဲကဵုဗဗွဲဓဝ်တအ်ရ။